Das Wort zum Sonntag

Griass eich mitanand, schee is, dass i heit zu eich ebbs song derf.

Gem duats mi scho lang. I woass soiba goned genau, etwa Tausend Johr scho.

I hob Zeitn ghobt, do ist ma scho gscheid schlecht ganga.

Hoiz hams aus mia ausser kafft

und koana hod mi aufgforst.

So schlecht is ma ganga vor 200 Johr 1825, dass mi an de Bauern verschengd ham.

I bin vom Besitz des Königreichs Bayern an die Bauern beim Hoizmann verlost worn.


De ham mi 200 Johr lang aufpabblt, dass i des bin, wos i bin.

Die Zeitn für mi wern wieda schlechta, weil einfach zu wenig Wossa auf mi oba feud

und da Käfa frissd an mir.

De Leit ham verschiedene Bam bei mir eigsetzt, dass i

bunta werd und mehra aushoid - des is guad.


Schee is ah ned, wenn oah Fliega noch dem andern über mi drüber rend,

oba gfrein dua i me, wenn ona bei mir spaziern gähd, der mi nimmd so wia i bin.


Gfrein duad mi, wenn de Reh, da Fuchs oda da Hoos bei mir spazieren gehn,

de nemman mi so wia i bin.

Es is a guad, wenn de Vögl bei mia singan und ummanand fliang, wenn a oana moi auf mi scheißt.

Es gfreid mi ah, wenn ebba bei meim Kreuz steh bleibt und bett.

Des ham de Leit aufgstoid, wirs eahna schlecht ganga is.


Und iatz is so weit:

Hoiz soid bei mir abghoizd wern, 7 ha, 15 ha usw. koana woass genau. Dann werd Kies in mi eine karld.

Brauch i den?

Dann kimmd die Rüttlwoizn und macht mi platt dann kimmd no Eisen und Beton und auf des auffe werds WINDRADL aufgstoid.


Leit, i bins eia Eiglwoid!

Hoffentlich kimmt in 20 Jahr ah wieda oana, der den ganzen Dreg aus mir ausse rammd, sonst schauts schlecht für mi aus


Oba ma muaß de Zeit nemma wias is, de Leit spinnan a moi mehra und a moi weniger.


An scheena Sonntag vom Eiglwoid, so lang i no schee bin.

Kemmts außa, und bsuachts mi.

Viele Griaß, da Eiglwoid

PS:Aber a gloane Hoffnung hob i scho no: Leid doaz um mi kämpfen, des dad mi gfrein wennts eich am Montag den 24.07.23 um dreiviertel sieben bis dreiviertel achte aufdnacht, beim Holzmann, für mich einsetzen dads.

Do is Eigentümerversammlung. Eine derf nur wer a Einladung hod, aber vorm Wirtshaus konn man ja Stellung nehmen. Angesprochen soi se jeder fühlen, ob Jung oder Alt, ob Eigentümer oder Spaziergänger, Schwammersucher usw. An Strom braucht a jeder, aber dann bin i der Preis.

Von der Gruppe "Rettet den Eiglwald (es ist soweit)".

PS: Matthias Mayerhofer ist nicht der Verfasser sondern nur der, der es veröffentlicht.